Tímamót og tækifæri: 10. bekkingar kynna sér lífið í FSN

Á myndinni má sjá hluta þeirra nemenda sem tóku þátt í Framhaldsskólaherminum ásamt Agnesi Helgu námsráðgjafa og Hrafnhildi skólameistara fyrir utan skólann. Tómas Freyr Kristjánsson tók myndina.

Það eru stór tímamót í lífi hvers unglings að ljúka grunnskóla og velja sér braut til framtíðar. Hjá Fjölbrautaskóla Snæfellinga (FSN) leggjum við metnað okkar í að styðja vel við bakið á nemendum á þessum krossgötum og sýna þeim þau fjölmörgu tækifæri sem bjóðast í heimabyggð.

Agnes Helga kynnir möguleikana

Liður í þessum stuðningi eru heimsóknir Agnesar Helgu, námsráðgjafa FSN, í alla 10. bekki á upptökusvæði skólans. Þar fer hún yfir almennt skipulag framhaldsskólanáms og kynnir sérstaklega þá fjölbreyttu möguleika sem FSN býður upp á. Markmiðið er að auðvelda nemendum valið og svara þeim spurningum sem brenna á þeim fyrir næsta skólastig.

Framhaldsskólahermirinn

Þann 10. febrúar sl. fór hinn árlegi Framhaldsskólahermir fram við góðar undirtektir. Þar fengu nemendur í 10. bekk af öllu Snæfellsnesi tækifæri til að prófa hvernig það er að vera nemandi í FSN.

• Skólaakstur: Nemendur utan Grundarfjarðar nýttu sér skólabílana sem aka á hverjum morgni til skólans, en við leggjum mikla áherslu á kosti þess að stunda nám í heimabyggð.

• Innan veggja skólans: Agnes Helga tók á móti hópnum og kynnti starfsemina, en að því loknu fóru nemendur í raunverulegar kennslustundir hjá kennurum skólans til að fá tilfinningu fyrir náminu.

• Nemendafélagið: Stjórn nemendafélagsins tók á móti 10.bekkingum og kynnti fyrir þeim félagslífið því eins og allir vita er nauðsynlegt að gott félagslíf sé í hverjum framhaldsskóla.

Persónulegt nám í fremstu röð

FSN býður upp á öflugt bóknám til stúdentsprófs þar sem áhersla er lögð á persónulega kennslu. Í minni skóla eins og okkar er hægt að koma til móts við þarfir og áhugasvið hvers og eins einstaklings, sem skapar gott og hvetjandi námsumhverfi.

„Við teljum að nálægðin og persónulega þjónustan sé okkar mesti styrkur. Það er dýrmætt fyrir nemendur að geta sótt metnaðarfullt nám án þess að þurfa að flytja langt að heiman strax að loknum grunnskóla.“

.