Kennari, námsráðgjafi og skólameistari í heimsókn í Framhaldsdeild FSN á Patreksfirði

Húsnæði Framhaldsdeildar FSN á Patreksfirði

Miðvikudaginn 26.nóvember fórum við þrjár, Steinunn kennari, Agnes námsráðgjafi og Hrafnhildur skólameistari með Baldri yfir Breiðafjörð til að heimsækja nemendur okkar í Framhaldsdeildinni á Patreksfirði. Þar hittum við nemendur, foreldra, kennara í grunnskólanum og bæjarstjórann. Einnig hittum við bæjarbúa sem voru að snæða hádegismat á Sjoppunni.  Framhaldsdeildin og framtíð hennar barst að sjálfsögðu í tal við alla og framtíð deildarinnar sem er vissulega óljós. Deildin tók til starfa árið 2007 en nú er staða sú að ekki hefur fengist starfsmaður í deildina í vetur og fjöldi nemenda í deildinni er í lágmarki. Allir sem ég talaði við voru á þeirri skoðun að ekki mætti leggja deildina niður því það væri slæmt að geta ekki haft börnin heima eftir að grunnskólagöngu ljúki. Vonandi fáum við fleiri umsóknir í deildina því okkur þætti slæmt að sjá á eftir þessari starfsemi.