Kennarar FSN sækja innblástur til Varsjár

Áslaug, Hermann og Steinunn fyrir utan skólann Zespół Szkół STO na Bemowie

Dagana 12.–16. apríl 2026 fóru Steinunn Ingibjörg Magnúsdóttir, Áslaug Sigvaldadóttir og Hermann Hermannsson, kennarar við Fjölbrautaskóla Snæfellinga, í skiptinám til Varsjár í Póllandi á vegum Erasmus+.

Þau dvöldu hjá skólanum Zespół Szkół STO na Bemowie (Fésbókarsíða skólans) sem er óhefðbundinn framhaldsskóli þar sem áhersla er lögð á skapandi og sveigjanlegar kennsluaðferðir. Í ferðinni tóku þau þátt í svokölluðu „job shadowing“, fylgdust með kennslu og fengu innsýn í pólskan skólarekstur og kennsluhætti.

Reynslan ætti að nýtast þeim vel í starfi, ekki síst í tengslum við pólska nemendur í FSN. Með betri skilningi á bakgrunni þeirra og skólamenningu eru kennararnir betur í stakk búnir til að styðja þá í námi.

Skiptinámið er liður í auknu alþjóðlegu samstarfi FSN og er stefnt að frekara samstarfi við pólska skóla á næstu árum.