Hlutverk og stefna Fjölbrautaskóla Snæfellinga

Síðast breytt: 13. desember 2006

Fjölbrautaskóli Snæfellinga er framhaldsskóli með áfangasniði sem vill skipa sér í fremstu röð og hefur það markmið að veita öllum nemendum góða menntun.

Hlutverk skólans er að;

• stuðla að alhliða þroska nemenda svo að þeir verði sem best búnir undir að taka virkan þátt í lýðræðisþjóðfélagi
• búa nemendur undir störf í atvinnulífinu og frekara nám
• efla ábyrgðarkennd, víðsýni, frumkvæði, sjálfstraust og umburðarlyndi nemenda
• þjálfa nemendur í öguðum og sjálfstæðum vinnubrögðum og gagnrýninni hugsun
• kenna nemendum að njóta menningarlegra verðmæta
• hvetja nemendur til stöðugrar þekkingarleitar.

Markmið skólans er að skapa metnaðarfullt námsumhverfi þar sem komið er til móts við þarfir hvers og eins með sveigjanlegu skipulagi. Við leggjum áherslu á persónuleg samskipti starfsfólks og nemenda og að nemendur mæti ávallt alúðlegu viðmóti.

Fjölbrautaskóli Snæfellinga starfar í umhverfi sem hefur markað sér stefnu í umhverfismálum og stefnir að vottun samkvæmt Green Globe. Umhverfisstefnu skólans má nálgast hér.

Skólinn leggur áherslu á að byggja upp öflugt og heilbrigt félagslíf nemenda um leið og unnið er markvisst að forvörnum. Í þessu skyni hefur skólinn sett fram forvarnastefnu og hefur auk þess sett sér nákvæmar vinnureglur er varða eftirlit á samkomum og ferðum á vegum skólans.

Skólinn leitast við að gæta jafnréttis á öllum sviðum og að skapa jákvætt samfélag fyrir starfsfólk og nemendur. Með þetta markmið í huga hefur skólinn sett sér sérstaka jafnréttisstefnu.