Fréttir
Forvarnardagur framhaldsskólanna 19. mars
Forvarnardagur framhaldsskólanna var í dag, 19. mars. Samtök íslenskra framhaldsskólanema (SÍF) hefur frumkvæði að þessum degi, sem haldinn er heilagur í öllum framhaldsskólum landssins í samstarfi við Lýðheilsustöð. Þema dagsins í ár var geðheilbrigði. Forseti nemendafélagsins undirbjó þennan dag í samstarfi við forvarnarfulltrúa FSN og varð að ráði að fá Matta Ósvald Stefánsson, sem ber titilinn heildrænn heilsuráðgjafi til þess að koma og halda fyrirlestur sem hann kallar Heilsa og hugarfar. Hann fór yfir mikilvægi mataræðis og kynnti aðferð sem afreksmenn á mörgum sviðum nota til þess að ná árangri, en í brennidepli að þessu sinni var Jón Arnór Stefánsson körfuboltakappi.
Matti fékk tímann frá kl. 10 til hádegis og fórst honum verkefnið afar vel úr hendi. Það var samdóma álit þeirra FSN-inga, sem inntir voru álits, að erindið hefði verið fróðlegt og áhugavert og fyllilega tímans virði og rúmlega það og gengu fullir hugmynda til hádegisverðar. Til hamingju NFSN með góðan árangur í starfi!