Sjálfsmatsáætlun - endurskoðuð í október 2009

Framkvæmdaáætlun um sjálfsmat - endurskoðuð janúar 2008

Ákveðið hefur verið að eftirfarandi verkefni verði fastur hluti af sjálfsmatskerfi skólans og verði unnin ýmist á hverri önn eða einu sinni á ári:

Kennslumat

Kennsla verður metin á hverri önn og kennarahópnum skipt í þrjá hluta þannig að lagt verður mat á kennslu hvers kennara þriðju hverja önn. Kennslumat verður framkvæmt með þeim hætti að lagður verður spurningalisti fyrir alla nemendur þeirra kennara sem eru í úttektarhópnum hverju sinni. Kennarar fara síðan í viðtal til skólameistara og þar eru niðurstöður úr kennslumati ræddar, auk niðurstaðna úr sjálfsmati sem kennarar eru beðnir að gera fyrir viðtalið. Skólameistari og kennari koma sér síðan saman um framhaldið, ræða til dæmis hugmyndir um endurmenntun eða þróun kennarans í starfi og hvort einhverjar breytingar eru nauðsynlegar varðandi kennslu kennarans.

Viðhorfskannanir

Viðhorfskönnun verður lögð fyrir alla nemendur skólans einu sinni á ári þar sem ýmsir þættir eru kannaðir, s.s. líðan nemenda, viðhorf þeirra til aðstöðunnar í skólanum og til skipulags kennslunnar.

Upplýsingar um námsárangur

Upplýsingar um námsárangur verða teknar saman í lok hverrar annar og þær notaðar til að leggja mat á þróunina og hvort breytinga sé þörf. Stjórnendur skoða niðurstöður í heild, en auk þess verða skipulagðir fundir með kennurum í upphafi hverrar annar þar sem kennarar skoða niðurstöður eftir námsgreinum og bera saman við fyrri annir.

Söfnun gagna

Á hverjum tíma verður ýmsum gögnum safnað um skólastarfið, bæði varðandi nemendafjölda, starfsmenn og fleira og verða þessar upplýsingar gerðar aðgengilegar í samhengi við skólanámskrá skólans sem er í mótun og verður unnin samhliða sjálfsmatskerfinu.

Niðurlag

Gert er ráð fyrir að gerð sé skýrsla um sjálfsmat skólans einu sinni á ári og að sjálfsmatsáætlunin verði endurskoðuð í kjölfarið. Þetta er mikilvægt til þess að tryggja að tilgangi sjálfsmatsins sé náð á hverjum tíma en hann felst meðal annars í því að öðlast skilning á skólanum eins og hann er, koma umbótum af stað, meta hvort umbótastarf skilar tilætluðum árangri og meta hvort settum markmiðum hefur verið náð. (OH, ágúst 2006, fylgiskjal 2).