SÁL 213 Lífeðlisleg sálfræði

Undanfari: SÁL 103

Áfangamarkmið
Nemandi
þekki gerð og starfsemi heila, tauga- og hormónakerfis í grófum dráttum
þekki niðurstöður rannsókna á klofnum heila og hvað þær segja okkur um sérhæfingu heilahvela og sjálfsvitund
þekki áhrif algengustu vímuefna á lífefnafræði heilans og skynjun
þekki og geti fjallað um skaðsemi ávana- og vímuefna
geti rakið ferli skynjunar frá því að skynfæri sjónar eða heyrnar eru áreitt og þar til boð berast heila, einnig í grófum dráttum skynferli lyktar, bragðs, snertingar og jafnvægis
geti fært rök fyrir því í hvaða mæli skynjun sé meðfædd eða lærð
þekki helstu niðurstöður rannsókna á skynjun, þekki t.d. til kenninga gestaltsinna um skynheildir og hugfræðinga um skemu
geti fjallað um vitund og fyrirbæri á mörkum vitundar, sem og breytt vitundarstig
þekki staðreyndir um svefnstig og svefnvandamál, drauma og leiðsluástand eins og dáleiðslu
þekki leiðir til að notfæra sér tilhneigingu okkar til dagdrauma á uppbyggilegan hátt
kynnist kenningum og rannsóknum varðandi dulskynjun og viti af hverju vísindamenn hafa efasemdir um tilvist dulskynjunar

Efnisatriði
Taugafruma, skipting taugakerfis, líffærafræði heila, staðsetning ýmissa skyn- og stjórnsvæða, sérhæfing heilahvela, hormón, skynjun, hugræn úrvinnsla skynáreita, skynvillur, yfirskilvitleg skynjun, eðli meðvitundar, breytt vitundarstig, vímuefni.

Námsmat
Eins og í öðrum sálfræðiáföngum er æskilegt að gildi lokaprófs og annareinkunnar sé svipað. Áframhaldandi þjálfun í vinnubrögðum greinarinnar er metin í tilraunum og skýrslugerð. Meta má hvernig nemandi hefur dýpkað þekkingu sína og um leið er æfð leit að og notkun heimilda með ritgerð og/eða vefsíðugerð um efni tengt áfanganum. Tímapróf og lokapróf mæla þekkingu en tímaritgerðir æfa nemendur í að taka sjálfstæða afstöðu til álitamála og færa gild rök fyrir skoðun sinni.
Tillaga að námsmati: lokapróf 50-60%, 2-3 skýrslur 10-15%, ritgerð eða vefsíðugerð 15%, 2-4 tímapróf/ritgerðir 10-15%, önnur verkefni 10%.