SÁL 203 Þroskasálfræði

Undanfari: SÁL 103

Áfangamarkmið
Nemandi
öðlist innsýn í viðfangsefni, rannsóknaraðferðir og helstu álitamál þroskasálfræðinnar
þekki hvaða rannsóknaraðferðir eru mest notaðar í þroskasálfræði, galla þeirra og kosti, til að nálgast örugga vitneskju um það sem víkur að þroska barna
verði fær um að lesa og túlka rannsóknarniðurstöður (texta og töflur) og meta hvort niðurstöður séu ábyggilegar eða ekki
þekki hugmyndir sem hafa haft mest áhrif á framvindu greinarinnar, a.m.k. hugmyndir sálkönnunar, atferlisstefnu og Piagets, og geri sér grein fyrir hvernig áhrif þeirra birtast í leikskólum, skólaskipulagi og viðhorfum í þjóðfélaginu
þekki alhliða þroskaferil barna, svo sem vitsmunaþroska, líkamsþroska, málþroska, persónuleikaþroska og siðgæðisþroska
skilji að hugsun barna er eðlisólík hugsun fullorðinna
átti sig á mikilvægi bæði líkamlegrar og andlegrar umönnunar og örvunar fyrir þroska barnsins
verði fær um að leita upplýsinga á fjölbreyttan hátt, með rannsóknum, í bókum, á Netinu, í tímaritum og með viðtölum við sérfræðinga og aðra
fái þjálfun í að kynna verkefni fyrir framan hóp og geti tekið á móti gagnrýni og metið verkefni annarra á gagnrýninn en jákvæðan hátt
skilji og geti gert grein fyrir mikilvægi fjölskyldunnar sem mótunarafls fyrir einstaklinginn
öðlist innsýn í hvað mótar kynhegðun
þekki nokkrar aðferðir og hugmyndir um árangursrík samskipti og hvernig jafna má ágreining á friðsaman hátt
þekki helstu áfanga á ævilöngum þroskaferli fólks
þekki til ýmissa vandamála sökum uppeldisaðstæðna, sjúkdóma eða fötlunar
þekki merki andlegrar vanlíðunar hjá börnum á mismunandi aldri og fjalli um hvernig heppilegast er að bregðast við barni sem á í erfiðleikum

Efnisatriði
Rannsóknir, upplýsingaöflun, hugmyndastefnur og áhrif þeirra, þroskaferill, umönnun, örvun, fjölskylda, kynhegðun, árangursrík samskipti, vanlíðan.

Námsmat
Æskilegt er að vægi matsþátta skiptist nokkurn veginn til helminga milli lokaprófs og vinnu á önninni. Á lokaprófi er metið hvort þekkingarmarkmiðum hefur verið náð, opnar spurningar mæla að auki skilning á ákveðnum þáttum og hæfni til að setja fram upplýsingar á skýran og skiljanlegan hátt. Skýrsla á að sýna færni í sjálfstæðum, vísindalegum vinnubrögðum og heimildanotkun, einnig færni í ritvinnslu sem er þverfagleg krafa á stúdentsbrautum. Með því að halda fyrirlestur sýna nemendur að þeir geti aflað heimilda á fjölbreyttan hátt og sett upplýsingar fram bæði munnlega (fyrir framan hóp) og myndrænt. Með verkefnum eru mismunandi þættir þjálfaðir og metnir, t.d. skilningur á og hagnýting fræðanna. Þó að umræður séu oft ekki metnar sem hluti af lokaeinkunn þá eru þær eigi að síður mikilvægur liður í menntun nemenda í þroskasálfræði.
Dæmi um gildi námsþátta: lokapróf 50-60%, stórt verkefni (t.d. tilraun og skýrsla) 15-20%, fyrirlestur 10-20%, tímapróf 10-15%, verkefni 10-15%.