FRA 503 Bókmenntir, hlustun

Undanfari: FRA 403

Áfangamarkmið
Nemandi
nái góðu valdi á frönskum framburði
auki enn við orðaforða sinn og geti notað hann í nýju samhengi
fái yfirlit yfir meginatriði franskrar málfræði
geti skilið aðalatriði í almennum samræðum og umfjöllun um efni sem tengjast bókmenntum og menningu
geti tileinkað sér efni bókmennta og efni um franska menningarþætti í gegnum kvikmyndir og með lestri og hlustun
þjálfist í að afla sér fróðleiks um ýmis önnur efni, t.d. í gegnum margmiðlun
geti tekið þátt í almennum viðræðum og skrifað um almenn efni, svo og efni sem tengjast bókmenntum og menningu þannig að vel skiljist
lesi franska bókmenntatexta og vinni þemaverkefni um bókmenntir og/eða einn eða fleiri þætti úr franskri menningarsögu

Efnisatriði
Framburður þjálfaður með tali og upplestri. Upprifjun á málfræði, bætt við nýjum samsettum tíðum og "passé siple". Nemendur lesa bókmenntaverk, horfa á kvikmyndir og fást við þætti sem tengjast frönskumælandi löndum og menningu þeirra í sem víðustum skilningi. Skrifleg og munnleg umfjöllun um viðfangsefnin. Nemendur vinna þemaverkefni og flytja þau fyrir aðra nemendur í hópnum. Hlustað á franskt tal eftir föngum, t.d. í fræðsluþáttum, fréttum, kvikmyndum og fyrirlestrum.

Námsmat
Í áfanganum er æskilegt að meta alla færniþættina fjóra, þ.e. hlustun, tal, lestur og ritun. Vægi þáttanna fer eftir mikilvægi þeirra í kennslunni. Hluti af lokamati getur byggst á verkefnum og könnunum á önninni.
Eðlilegt er að símat fái aukið vægi í þessum áfanga. Lesskilning, ritfærni og málfræðikunnáttu má meta með skriflegu prófi í annarlok, skilning á mæltu máli með hlustunarkönnunum á önninni og/eða hlustunarprófi í lokin og munnlega færni með talæfingum, flutningi fyrirlestra á önninni og/eða munnlegu prófi í annarlok.