FRA 103 Framburður, orðaforði, menning

Áfangamarkmið
Nemandi
nái nokkuð góðum tökum á frönskum framburði, tengingum orða, áherslum og hrynjandi og þekki öll nefkveðin sérhljóð, blísturshljóð og rödduð hljóð
læri orðaforða sem tengist kynningum, kveðjum, spurningum, persónulegum upplýsingum, fjölskyldu, áhugamálum og staðháttum
læri nútíð algengra sagna, greinana, kyn og tölu nafn- og lýsingarorða, fornöfn, töluorð og forsetningar
geti náð ákveðnum upplýsingum í töluðu máli sem tengist viðfangsefnum áfangans
geti lesið einfalda texta sem miðast við orðaforðann sem hann lærir í áfanganum
kunni algengustu kveðjur og kurteisisvenjur sem tíðkast í mannlegum samskiptum, svo sem að þúa, þéra, heilsa, kveðja, þakka og afsaka
geti kynnt sig og aðra, lýst nánasta umhverfi, tekið þátt í samræðum um kunnuglegt efni og skipst á upplýsingum við frönskumælandi fólk um sig og hagi sína með einföldum spurningum og svörum
geti notað einfaldar setningar til að skrifa kynningar, stuttar lýsingar, stutt bréf og skilaboð
geti beðið um og gefið einfaldar upplýsingar skriflega
þjálfist í réttritun
fræðist um Frakkland, uppruna og útbreiðslu franskrar tungu, kynnist atriðum í daglegu lífi frönskumælandi þjóða og vakni til vitundar um mismunandi menningarheima

Efnisatriði
Frumatriði franskrar hljóðfræði með áherslu á hljóð sem ekki eru til í íslensku. Hljómfall staðhæfinga og spurninga. Nemendur hlusta og endurtaka. Myndun setninga í nútíð, staðhæfinga, spurninga og setninga með neitun. Persónu-, eignar-, ábendingar- og spurnarfornöfn. Samtalsæfingar úr eigin smiðju eða kennslubókinni sem snúast um að kynnast öðrum og kynna sig. Orðaforðaæfingar út frá lesnu efni í kennslubók eða úr ítarefni. Skriflegar lýsingar eða stuttar frásagnir, m.a. út frá myndum. Réttritun æfð, t.d. með því að skrifa niður eftir upplestri. Daglegt líf Frakka og frönskumælandi þjóða í hnotskurn gegnum námsefnið (les-, hlustunar-, mynd- eða margmiðlunarefni).

Námsmat
Í áfanganum er æskilegt að meta alla færniþættina fjóra, þ.e. hlustun, tal, lestur og ritun. Vægi þáttanna fer eftir mikilvægi þeirra í kennslunni. Eðlilegt er að hluti af lokamati byggist á könnunum og verkefnum á önninni. Lesskilning, ritfærni og málfræðikunnáttu má meta með skriflegu prófi í annarlok, skilning á mæltu máli með hlustunarkönnunum á önninni og/eða hlustunarprófi í lokin og munnlega færni með talæfingum á önninni og/eða munnlegu prófi í annarlok.