ENS 303 Flóknir textar, bókmenntir

Undanfari: ENS 203

Áfangamarkmið

Nemandi

Lestur  

• geti lesið fjölbreytta bókmenntatexta og beitt grunnhugtökum í bókmenntafræðilegri greiningu þeirra 
• geti lesið á milli línanna og áttað sig á dýpri merkingu orða þegar fjallað er um efni sem hann hefur kynnt sér 

Hlustun  

• geti hlustað á og skilið ensku sem töluð er við ólíkar aðstæður og með mismunandi hreim (t.d. í kvikmyndum, sjónvarpi, útvarpi) og áttað sig á blæbrigðum málsins (hvort talað er í hæðnistón, af einlægni, af alvöru, í gríni o.s.frv.) 
• geti brugðist við töluðu máli á ólíkan hátt, t.d. með endursögn (munnlegri, skriflegri), svörum, útdrætti o.s.frv. 
• geri sér grein fyrir því að ekki er alltaf þörf að skilja allt sem sagt er og að hægt sé að geta í eyðurnar 

Tal  

• geti haldið stutt erindi um sérhæft efni með viðeigandi orðaforða og eðlilegum hraða og hrynjandi - blaðalaust en ef til vill með aðstoð punkta eða stikkorða 
• geti umorðað, útskýrt og leiðrétt sig ef orðaforða þrýtur eða misskilningur á sér stað 
• geti brugðist við óvæntum aðstæðum, t.d. spurningum 

Ritun  

• geti tjáð sig skriflega í ritunarverkefnum þar sem reynir á ímyndunarafl og skapandi notkun málsins 
• geti beitt meginreglum enskrar málfræði, setningafræði og stafsetningu í rituðu máli 
• geti sett fram mál sitt á sjálfstæðan, skipulegan, rökrænan og hnitmiðaðan hátt 
• geti skrifað bréf - t.d. fyrirspurnir, umsóknir o.s.frv. 
• geti skrifað ritgerðir þar sem tillit er tekið til uppbyggingar, röksemdafærslu og notkunar heimilda 

Málfræði  

Markmiðið er að við lok áfangans kunni nemandinn skil á og geti beitt öllum helstu reglum í enskri málfræði í samræmi við og í framhaldi af því sem unnið hefur verið með í ENS 103 og ENS 203. Gera má ráð fyrir því að á þessu stigi sé um að ræða frekari æfingu og dýpkun skilnings á einstökum málfræðiatriðum heldur en algerlega nýja þætti.

Um er að ræða

• tíðir sagna - flóknari notkun (framhald) 
• háttarmyndandi sagnir (modal verbs) 
• sambandssagnir (phrasal and prepositional verbs) 
• tilvísunarsetningar 
• skilyrðissetningar 
• bein og óbein ræða 
• samhengi í ritmáli (cohesion) 
• ritun flóknari setninga 
• samtengingar og tengiorð (transition words) 
  

Námsmat
Við námsmat skal ávallt taka mið af þeirri vinnu sem nemendum er ætlað að inna af hendi samkvæmt námsáætlun og skulu kröfur gerðar í samræmi við það. Meta skal alla færniþætti í réttu hlutfalli við vægi þeirra í áfanganum. Nemendum sé alltaf gert ljóst hvað verið er að meta, hvernig, hvenær og hvers vegna. Námsmat getur verið í formi símats eða lokamats.

Dæmi um mat á færniþáttum 

Lestur
Matsaðferðir geta verið svipaðar í öllum grunnáföngum en gæta verður þess að þyngd textanna sé í samræmi við getu nemenda og þær námskröfur sem gerðar eru.

Dæmi um mat gæti verið formleg prófun eða könnun á lesskilningi, svo sem krossapróf, eyðufyllingar, spurningar úr texta. Óformleg könnun á lesskilningi, svo sem þegar nemendur gera útdrátt úr texta, semja spurningar, búa til orðagátur eða annars konar verkefni.

Hlustun
Tekin niður helstu efnisatriði úr stuttum fyrirlestri.

Tal
Metið með formlegu munnlegu prófi og/eða símati, t.d. við flutning erinda í kennslustund, frásögn um bók eða kvikmynd o.s.frv. Meta skal framsetningu, skipulag, orðaforða, framburð, ítónun, áherslu, flæði og tjáskiptahæfni.

Ritun
Mat á ritun getur beinst að einstökum þáttum ritunar, t.d. tileinkun orðaforða, hæfni í stafsetningu, málfræði og setningafræði; innihaldi og formi í ritgerðum; skapandi málnotkun; rökstuðningi og eigin áliti.

Mat ætti eftir föngum að gefa nemandanum ábendingar um villur og tækifæri til að bæta það sem ábótavant er.

Lokamat: samspil innihalds og málnotkunar eftir eðli verksins.