DAN 202 Skilningur, tjáning, menning II

Undanfari: 102

Áfangamarkmið

Lestur
Nemandi

• geti fljótt og örugglega áttað sig á megininntaki ýmiss konar texta þótt þeir skilji ekki hvert orð
• geti lesið og skilið inntak lengri texta svo sem bókmenntatexta eða annarra texta, sem í löngu máli fjalla um efni almenns eðlis
• geti lesið mismunandi gerðir rauntexta, sem tengjast efnisflokkum, sér til gagns
• lesi að minnsta kosti eina hraðlestrarbók

Hlustun

• geti greint fyrirhafnarlítið flest lykilorð úr skilgreindum efnisflokkum
• skilji og geta nýtt sér hagnýtar upplýsingar sem heyrast við ákveðnar aðstæður, t.d. á járnbrautarstöð, á flugvelli, í banka, á matsölustöðum og öðrum stöðum sem tengjast daglegu lífi
• skilji einfaldar upplýsingar og leiðbeiningar sem sagðar eru á símsvara
• geti hlustað eftir tilteknum upplýsingum í þekktum tegundum texta, t.d. fréttum, veðurlýsingum og leiðbeiningum
• skilji samtal tveggja til þriggja manna
• skilji smáatriði í almennum lengri frásögnum (5-7 mín.) og samtölum

Tal

• hafi tilfinningu fyrir framburði allra hljóða, áherslum og hrynjandi málsins
• geti tekið þátt í samræðum um tiltekin málefni
• geti tjáð sig á þann hátt að nota bæði aðal- og aukasetningar
• geti talað dönsku lipurlega og með það góðum framburði, hrynjandi og áherslum að vel skiljist
• geti tjáð hugsun sína á dönsku skýrt og skilmerkilega við mismunandi aðstæður og með ólíkan tilgang í huga
• geti útskýrt og rökstutt mál sitt um efni sem fjallað hefur verið um

Ritun

• geti hagað orðum sínum og málfari í samræmi við efni textans hverju sinni
• hafi vald á að skrifa nokkrar mismunandi textagerðir, t.d. minnisatriði og endursagnir
• geti virkjað orðaforða sinn á meðvitaðan hátt með því að skrifa um efni sem unnið hefur verið með, t.d. í tengslum við ákveðin þemu
• geti skrifað viðstöðulaust u.þ.b. 30 línur á 10 mín. um efni sem búið er að fást við (sjá kafla um upplýsingatækni)

Málfræði

• geti í flokki sagnorða beitt
• hjálparsögnum
• öllum kennimyndum allra algengustu sagna
• geti beitt óreglulegum endingum lýsingarorða

Efnisatriði – leiðardæmi

Ferðalög í Danmörku og víðar á Norðurlöndum, dægradvöl í sumarleyfi, skipulagning sumarleyfis, gisting, fæði, útbúnaður, samgöngur (hvað er líkt/ólíkt á Íslandi annars vegar og Danmörku/annars staðar á Norðurlöndum hins vegar), að vísa til vegar, peningar, bankar, bílpróf, ökuskírteini, umferðarreglur, bílakaup og  bílasala, kostnaður við bíla/vélhjól, lögregla, tegundir afbrota, neyðarhjálp, rannsóknir sakamála, íþróttir, líkamsrækt, líkaminn.

Námsmat

Námsmat tekur mið af þeirri vinnu sem nemendum er ætlað að inna af hendi samkvæmt námsáætlun og kröfur gerðar í samræmi við það. Meta skal alla færniþætti í hlutfalli við vægi þeirra í kennslunni /náminu. Nemendur eru gerðir ábyrgir fyrir mati að hluta til og þeim gerð grein fyrir því hvað verið er að meta, hvernig, hvenær og hvers vegna. Námsmat getur verið í formi símats eða lokamats.